Möndlutrén í Algarve

möndlublóm

Enn þann dag í dag má snemma á vorin sjá "snævi" þakta jörð af möndlutrjám á 150 km. svæði á vesturhluta Algarve. Algarvebúar eru stoltir af þessari óvenjulegu litadýrð innan um annars rauðbirkið landslagið. Ef þið hyggið á ferð til Algarve í sumar, látið þá ekki fram hjá ykkur fara hinn ljúffenga möndlulíkjör sem Algarvebúar eru þekktir fyrir en flytja því miður út í mjög litlum mæli. Meira að segja í Lissabon er þessi einstaki líkjör ekki fáanlegur í öllum vínbúðum.

Möndlulíkjör eða Licor de Amêndoa er frekar ljós á lit, vel þykkur og hefur gott, sætt eftirbragð sem situr eftir um allan munninn.

Blanda af Amaretto og Bailey´s
Ef ég ætti að reyna að líkja bragðinu og tilfinningunni við að dreypa á þessum ljúfa drykk þá dettur mér helst í hug blanda af Amaretto og Bailey´s. Hann hefur hnetukeiminn frá Amaretto en mýktina og hið ljúfa eftirbragð sem Bailey´s er löngu þekktur fyrir.

Licor de Amêndoa er ekki vörumerki heldur tegund og því til frá mörgum framleiðendum og fæst í öllum "Marrachino"-matvörumörkuðum og "mini-mercados" á Algarve. Sjálfum þykir mér þeir hver öðrum betri en ég læt hvert ykkar um að meta það sjálf. Flestir framleiðendur setja vöru sína á háar mjóar flöskur sem eru hrímaðar líkt og glas sem staðið hefur í frystiskáp. Þetta eru fallegar flöskur sem skapa forvitni og kítla bragðlauka verðandi neytanda. Þó eru til fleiri útgáfur sem eru dekkri og líkjast frekar öðrum hnetulíkjörum sem við þekkjum hér á landi. Dæmi um það má finna á þessari slóð en því miður tókst mér ekki að finna neinar myndir af hinum hefðbundna eðaldrykk. Eins og þið sáuð sem smelltuð á slóðina er þetta ekki dýr vara, kostar 5 Evrur sem eru um 420 íslenskar krónur (mars 2003).

Heimatilbúinn möndlulíkjör
Þið sem heima sitjið í sumar en eruð orðin þyrst af þessari umfjöllun ættuð kannski að prófa þessa uppskrift sem ég fékk frá gamalli konu í Silves sem á tímum Máranna var höfuðborg Algarve.
Notið hálfa flösku af víni s.s. Madeiravíni eða ungu Púrtvíni (Tawny eða jafnvel Ruby, allt eftir smekk),
1/2 kg af sykri,
1 bolla af rauðvíni (notið ungt og létt vín),
1 bolla af vatni,
1 msk. vanilludropa og
1 glas af möndlu-essens sem fæst m.a. í Ámunni.

Setjið þetta allt í mixer, blandið og setjið á flöskur. Leyfið drykknum að jafna sig í nokkrar vikur og njótið svo. Auðvitað má prófa sig áfram með þessa uppskrift svo sem að nota aðeins hærra hlutfall víns, Sherrý í stað Madeira, hvítvín eða rósavín í stað rauðvíns eða möndludropa ef ekki fæst essens.